Azərbaycanın Los Ancelesdəki baş konsulu Nəsimi Ağayev Kaliforniyanın ali qanunverici orqanı olan Kaliforniya Ştat Senatının plenar sessiyasında çıxış etmişdir.

Baş Konsulluqdan verilən məlumata görə, çıxış zamanı Senatın plenar iclas zalında Azərbaycan bayrağı qaldırılmışdır.

Senatda respublikaçılar fraksiyasının rəhbəri Bob Haff Nəsimi Ağayevi senatorlara təqdim edərək Azərbaycanın ABŞ-ın strateji müttəfiqi və Kaliforniya ilə geniş əməkdaşlıq əlaqələrinin qurulmasında maraqlı olduğunu xüsusi vurğulamışdır.

Baş konsul çıxışında Azərbaycan xalqının müstəqillik uğrunda apardığı mübarizədən, ölkəmizin əldə etdiyi nailiyyətlərdən, regionda oynadığı önəmli roldan, müxtəlif dinlər və millətlər arasındakı tolerant münasibətlərdən ətraflı bəhs etmişdir. Azərbaycan-ABŞ strateji tərəfdaşlıq münasibətlərinə toxunan baş konsul hər iki ölkənin ümumi dəyərləri, maraqları və gələcəyə baxışları bölüşdüyünü bildirmiş, Xəzər hövzəsi kimi önəmli bir bölgədə ölkəmizin ABŞ-ın etibarlı və mühüm tərəfdaşı olduğunu diqqətə çatdırmışdır. Azərbaycanın Kaliforniya ilə bütün sahələrdə münasibətləri inkişaf etdirmək niyyətini bildirən baş konsul bu sahədə ştatın ali qanunverici orqanı və senatorlarla sıx əməkdaşlıq etməyə hazır olduğunu bəyan etmişdir.

Tədbir çərçivəsində Nəsimi Ağayev Kaliforniya Senatının sədri Darrell Staynberqlə görüşərək fikir mübadiləsi aparmışdır.

“Xalq qəzeti”