Azərbaycan və Norveç Avropanın enerji təminatında mühüm rol oynayırlar. AzərTAc xəbər verir ki, bu fikirlər yanvarın 14-də ölkəmizdə rəsmi səfərdə olan Norveçin xarici işlər naziri Espen Bart Eide Azərbaycan Diplomatik Akademiyasında (ADA) “Norveç təcrübəsi  Azərbaycana münasibdirmi?” mövzusunda mühazirəsində əksini tapmışdır.

Tədbirdə ADA-nın professor-müəllim heyəti və tələbələri, Milli Məclisin deputatları, dövlət qurumlarının,  Azərbaycanda akkreditə olunmuş diplomatik korpusun nümayəndələri, gənclər təşkilatlarının və KİV-lərin təmsilçiləri iştirak etmişlər.

Norveçin və ölkəmizin oxşar cəhətlərindən danışan nazir Azərbaycanın hələ gənc bir dövlət olmasına baxmayaraq, uğurlu xarici siyasət yürütdüyünü vurğulamışdır.

E.Bart Eide Norveçin neft-qaz sahəsində əldə etdiyi təcrübəsindən, enerji sərvətlərinin satışından qazanılan vəsaitlərin xərclənməsindən də danışmışdır. Norveçli nazir xüsusi qeyd etmişdir ki, regionun digər ölkələrindən fərqli olaraq Azərbaycan neft gəlirlərindən səmərəli istifadə edir.

Norveçli nazirin geniş mühazirəsi böyük maraqla dinlənilmişdir.

E.Bart Eide tələbələrin suallarını da cavablandırmışdır.

Sonra norveçli nazirə ADA-nın xatirə medalı təqdim edilmişdir.

E.Bart Eide ADA-nın yeni təhsil kompleksi, akademiyanın kitabxanası “ADA Library” ilə də tanış olmuşdur.

AzərTAc