BMT-nin Humanitar Məsələlərin Koordinasiya İdarəsi ötən il Cənubi Qafqazda və Mərkəzi Asiyada baş verən fövqəladə halların xəritəsini hazırlamışdır.

APA-nın məlumatına görə, xəritədə 2012-ci ildə hər bir ölkədə baş verən təbii və texnogen xarakterli fəlakət və qəzalar barədə informasiyalar yer almışdır.

Ötən il Cənubi Qafqaz və Mərkəzi Asiya regionunda kiçik və orta miqyaslı bir sıra fövqəladə vəziyyətlər yaranmışdır. Azərbaycanda baş verən zəlzələ nəticəsində 7006 ev zədələnmiş, bir nəfər həlak olmuş, 5 nəfər yaralanmışdır.

Gürcüstandakı daşqınlardan  zərər çəkmiş 19 min nəfər Suriyadakı münaqişələr nəticəsində isə 6 minədək erməni Ermənistanda sığınacaq tapmışdır.

BMT-nin Humanitar Məsələlərin Koordinasiya İdarəsi qeyd edir ki, əksər hallarda yerli hökumətlər fövqəladə halların nəticələrini aradan qaldırmağa - zərərçəkənləri yaşayış yeri, ərzaq su və digər zəruri vasitələrlə təmin etməyə müvəffəq olmuşlar. Bununla belə zərərçəkənlərə uzunmüddətli bərpa prosesində humanitar dəstəyin verilməsinin zəruriliyi tövsiyə olunmuşdur.