Yanvarın 9-da Qazaxıstan Baş nazirinin müavini Krımbek Kuşerbayevin başçılıq etdiyi nümayəndə heyəti Azərbaycana səfəri çərçivəsində Xırdalandakı “Zəhmət-Ruzi” Məhdud Məsuliyyətli Cəmiyyəti (MMC) ilə tanış olmuşdur.

“Zəhmət-Ruzi” MMC ilə tanışlıq zamanı nümayəndə heyətinə şirkətin fəaliyyəti barədə ətraflı məlumat verilmişdir.

Diqqətə çatdırılmışdır ki, 1998-ci ildən fəaliyyət göstərən “Zəhmət-Ruzi” MMC ət və süd məhsulları istehsal edir. Hazırda şirkət 3,2 hektar ərazidə yerləşir. Burada ən müasir avadanlıqla təchiz edilmiş laboratoriyalar, istehsal sexləri, soyuducu anbarlar və daşınma sistemləri mövcuddur. Ekoloji təmiz, yüksək keyfiyyətlə “SAB” ət və süd məhsulları beynəlxalq standartlara uyğun şəkildə Azərbaycan istehlakçılarına təqdim olunur. “SAB” ticarət nişanı “AZS” - keyfiyyət, idarəetmə standartının sertifikatına layiq görülmüşdür.

Vurğulanmışdır ki, burada gün ərzində 10-12 ton ət məhsulları, 5-6 ton süd məhsulları istehsal olunur. Hazırda məhsulların xaricə ixrac edilməsi üçün danışıqlar aparılır. 

AzərTAc