MDB Parlamentlərarası Assambleyasının (PA) yaz sessiyasında Azərbaycanın işğal olunmuş ərazilərində talan olunan qeyri-maddi mədəni irsə də şamil edilən “Qeyri-maddi mədəni irsin mühafizəsi haqqında” qanun layihəsi müzakirəyə çıxarılacaq. Bu barədə APA-ya MDB PA-nın Mədəniyyət, İnformasiya, Turizm və İdman məsələləri üzrə Daimi Komissiyasının sədr müavini, azərbaycanlı deputat Elmira Axundova məlumat vermişdir.

O, qeyd edib ki, komissiyanın apreldə nəzərdə tutulan iclasında qanun layihəsinin Azərbaycanın işğal olunmuş ərazilərində talan olunan qeyri-maddi mədəni irsə də şamil edilməsi təklif formasında həmin sənədə daxil olunmuşdur: “Əvvəlcə bu bənd daxil edilməmişdi, sənəddə yalnız respublika daxilində qeyri-maddi mədəni irsin mühafizəsinə qarşı təxribatlar öz əksini tapmışdı. Lakin bizim təklifimiz və təkidimizlə hansısa respublikaya məxsus qeyri-maddi mədəni irsə qarşı digər dövlət tərəfindən də edilən təcavüzlə bağlı bənd də sənəddə öz əksini tapdı. Sənəd müzakirə olunan zaman biz Azərbaycanın işğal olunmuş ərazilərində Ermənistan tərəfindən talan edilən qeyri-maddi mədəni irs barədə məsələni ortaya qoyacağıq”.

Deputat onu da bildirmişdir ki, komissiyanın iclasında “İnsan haqları, dini azadlıq və dini təşkilatlar” haqqında qanun layihəsi də müzakirəyə çıxarılacaq.