Ermənistan prezidentliyinə potensial namizədlər tələb olunan pul girovu ilə bağlı öz narazılıqlarını bildiriblər.

 APA-nın “ArmToday” saytına istinadən verdiyi məlumata görə, namizədlərin bəziləri Ermənistan MSK-nın iclasında deyiblər ki, ölkənin hazırkı sosial-iqtisadi şəraitdə tələb olunan 8 milyon dramın (təxminən 20 min ABŞ dolları) ödənilməsi qeyri-mümkündür.

Partiya mənsubiyyəti olmayan namizədlərdən Pavlik Sarkisyan bildirib ki, Ermənistan Konstitusiyasına əsasən hər bir vətəndaş prezidentliyə namizədliyini  irəli sürə bilər: “Lakin bu gün ölkə əhalisinin 95 faizi imkansızdır və namizəd olmaq üçün girov ödənilməsi Ermənistan Konstitusiyasına ziddir. Bu, nə kazinodur? Mən bura qumar oynamağa gəlmişəm?”

Digər namizəd, 10 ildir ki, işsiz olan Mqer Ayrapetyan da bildirib ki girov ödənilməsi ilə bağlı tələb Konstitusiyaya ziddir.  MSK isə girov ödəməyən potensial namizədlərə əlavə 48 saat vaxt verib. Əgər onlar 10 yanvar saat 14:00-a qədər tələb olunan girovu təqdim etməsələr, onların namizədliyi ləğv ediləcək.