Biz o  xoşbəxt xalqlardanıq ki, taleyimiz  çox etibarlı əllərdədir. Xalqımızın güzəranı ildən-ilə yaxşılaşır, dövlətimizin  beynəlxalq aləmdə nüfuzu  durmadan artır. Cəmi iyirmi illik müstəqillik tarixi olan ölkəmiz artıq regionun lider dövlətinə çevrilmişdir.

Son iyirmi ildə qazanılmış uğurlar o qədər çoxdur ki, sadalamaqla qurtaran deyil. Bütün  bu nailiyyətlər  dövlətimizi bəlalardan xilas etmiş, dünyanın nəhəng liderlərindən olan, ulu öndər Heydər Əliyevin ölməz ideyalarına söykənərək, az zaman kəsiyində onu zirvələrə çatdıran  hörmətli Prezidentimiz  İlham Əliyevin davamlı, uzaqgörən  siyasəti nəticəsində əldə olunmuşdur.  

Böyük uğurlarla dolu 2012-ci ili arxada qoyduq. Bizi qarşıda  yeni yüksəliş,  nailiyyətlər, sabahın uğur dolu xoş anları gözləyir. Azərbaycan  2020-ci ilə qədər  olan strateji hədəflərini müəyyənləşdirib. Bu yaxınlarda  keçirilən “Azərbaycan 2020: Gələcəyə baxış” adlı konfransda deyildiyi kimi  xalqımız öz müstəqillik yolunda inamla irəliləyəcək, misilsiz uğurlar əldə edəcək. Bizi bu yüksəlişə aparan yolun  əsasının  qoyulduğu isə artıq hər kəsə məlumdur. Qazandığımız  bu nailiyyətlərdə  Heydər Əliyev Fondunun xidmətləri də az olmamışdır. Bu gün ölkəmizin bütün regionlarında  Azərbaycanın  birinci xanımı, YUNESKO və İSESKO-nun xoşməramlı səfiri, Milli Məclisin deputatı Mehriban  xanım Əliyevanın təsəbbüsü ilə prezidenti olduğu Heydər Əliyev Fondu tərəfindən inşa edilən yüzlərlə məktəb, xəstəxana, mədəniyyət müəssisəsi  tikilib istifadəyə verilmişdir. Azərbaycan  mədəniyyət və incəsənətinin dünyaya inteqrasiya olunmasında Mehriban xanımın xidmətləri əvəzsizdir. Azərbaycan muğamının, xalça və saz sənətimizin, Azərbaycan tarının  dünyanın qeyri-maddi – mənəvi irs siyahısına daxil edilməsi də məhz Mehriban  xanımın  böyük xidmətlərinin nəticəsidir.

Ötən il milli təhsilimiz də  inkişafının yeni mərhələsini yaşamışdır. Xüsusilə yeni tikilmiş məktəblərin istifadəyə verilməsi, tədris prosesinə elektron texnologiyaların gətirilməsi, elektron dərsliklərin yaradılması sahəsində mühüm  nailiyyətlər əldə olunmuşdur.

Ölkənin siyasi həyatında  çox əhəmiyyətli rol oynayan Yeni Azərbaycan Partiyası 2012-ci ildə yaranmasının  20 illiyini qeyd etdi. Bu illər ərzində  partiyamız   mətinləşdi,  öz sıralarını genişləndirdi, tərəfdarlarını öz ətrafında daha sıx birləşdirdi.YAP xalqın partiyasıdır. Xalq bu  partiyaya inanır, öz gələcək taleyini də  bu partiyaya etibar edəcəyi şübhəsizdir.

Bu gün hər bir azərbaycanlını Dağlıq Qarabağ problemi ciddi narahat edir. Torpaqlarımızın 20 faizi erməni işğalçıları tərəfindən işğal edilmiş, bir milyon  insan öz yurd-yuvasından didərgin düşmüşdür. Xalqımız inanır ki, gec-tez ədalət zəfər çalacaq, torpaqlarımız geri qaytarılacaq, Azərbaycanımızın suveren hüquqları bərpa olunacaq. Qarşıda Azərbaycanımızı uğurlarla dolu yeni il  gözləyir. Xalqımız yeni ilə böyük ümidlərlə gedir və yaxşı bilir ki,  gələcəyimiz etibarlı əllərdədir.

Yeni il ərəfəsində qədirbilən xalqımızı təbrik edir,  yollarında ona sülh, əmin-amanlıq və  müstəqilliyimizin möhkəmləndirilməsi yolunda  möhkəm  iradə və  hədsiz inam arzulayıram.

Nurlana ƏLİYEVA,
YAP Qadınlar Şurasının sədri