ABŞ-ın dövlət katibi Hillari Klintonun bu günlərdə Azərbaycana gözlənilən səfəri kifayət qədər səmərəli nəticə ilə yekunlaşacaqdır.
Bu sözləri Prezident Administrasiyası ictimai-siyasi məsələlər şöbəsinin müdiri Əli Həsənov jurnalistlərə açıqlamasında bildirmişdir.
Şöbə müdiri demişdir ki, bu səfər təkcə Ermənistan-Azərbaycan, Dağlıq Qarabağ münaqişəsinin nizamlanması ilə bağlı deyil, həm də Azərbaycan-ABŞ münasibətlərinin bu günü və gələcəyi ilə əlaqədar məsələləri əhatə edəcəkdir.
Əli Həsənov demişdir: "Azərbaycan ABŞ ilə beynəlxalq terrorizmə qarşı mübarizədə və sülhyaratma proseslərində neçə illərdir ki, birgə iştirak edir. Azərbaycan beynəlxalq enerji təhlükəsizliyində ABŞ ilə vahid strategiya yürüdür. Xüsusən, Cənubi Qafqazın enerji resurslarının dünya bazarlarına çıxarılması və Avropa İttifaqı ilə enerji sahəsində əməkdaşlığın qurulması həm ABŞ, həm də Azərbaycanın strateji maraqlarına cavab verir.
Bundan başqa, Azərbaycan ABŞ ilə demokratiya, insan hüquqları, vətəndaş cəmiyyəti quruculuğu sahəsində yaxından əməkdaşlıq edir və neçə illərdir ki, Birləşmiş Ştatların aparıcı qeyri-hökumət təşkilatları, beynəlxalq sahədə fəaliyyət göstərən tanınmış institutları Azərbaycanda fəaliyyət göstərirlər.
Mən düşünürəm ki, xanım Klintonun Azərbaycana səfəri kifayət qədər səmərəli nəticə ilə yekunlaşacaqdır".
AzərTAc{nl}