Avropa Şurasının prezidenti Xerman Van Rompey əmindir ki, Avropa Şurası ilə Rusiyanın əməkdaşlığı Avropa məkanında münaqişələrin tənzimlənməsinə şərait yarada bilər.

AzərTAc xəbər verir ki, Rompey Avropa Şurası ilə Rusiya Federasiyası arasında 30-cu ikitərəfli sammitdə çıxış etmişdir. O qeyd etmişdir ki, AŞ ilə Rusiyanın fəal əməkdaşlığı Dnestryanı münaqişənin və Ermənistan-Azərbaycan, Dağlıq Qarabağ münaqişəsinin tənzimlənməsi məsələlərində irəliləyişə gətirib çıxara bilər.

Xatırladaq ki, Avropa Şurası ilə Rusiya Federasiyası arasında yüksək səviyyədə 30-cu ikitərəfli sammit bu gün Brüsseldə keçirilir.

Görüşdə Rusiyanı Prezident Vladimir Putin, Avropa Şurasını isə AŞ prezidenti Xerman Van Rompey və Avropa Komissiyasının sədri Joze Manuel Barrozu təmsil edir.

Bu gün keçirilən plenar iclasda liderlər Rusiyada və Avropa Şurasında siyasi və iqtisadi vəziyyəti, həmçinin AŞ-Rusiya münasibətlərinin inkişafının strateji perspektivlərini müzakirə edirlər.