Qəbələ radiolokasiya stansiyasının (RLS) daşınan və daşınmaz əmlakının inventarlaşdırılması üzrə komissiya stansiyada aparılan inventarlaşdırma işini başa çatdırmışdır.  İnventarlaşdırma işlərinin nəticəsi olaraq müvafiq sənəd hazırlanaraq Azərbaycan və Rusiya hökumətlərinə təqdim olunacaq.

Qeyd edək ki, Qəbələ radiolokasiya stansiyasının (RLS “Daryal”) daşınan və daşınmaz əmlakının inventarlaşdırılması üzrə Azərbaycan-Rusiya Birgə Komissiyasının Azərbaycan tərəfdən tərkibi noyabr ayının 15-də təsdiq olunmuşdur. Komissiyaya 1 ay müddətində Qəbələ RLS-in əmlakının inventarlaşdırılmasını həyata keçirərək nəticələr barədə məlumatları Nazirlər Kabinetinə təqdim etmək tapşırılmışdır.

İnventarlaşdırma komissiyasının sədri Hərbi Hava Qüvvələrinin komandanı, general-mayor Altay Mehdiyev, komissiya sədrinin müavini Əmlak Məsələləri Dövlət Komitəsinin dövlət əmlakının idarə edilməsinin təşkili şöbəsinin dövlət əmlakının registri sektorunun müdiri İsmayıl Həsənlidir.

Qeyd edək ki, “Azərbaycan Respublikası hökuməti və Rusiya Federasiyası hökuməti arasında Qəbələ RLS-in statusu, istifadə prinsipləri və şərtləri haqqında Saziş” 2002-ci ildə imzalanmışdır. Rusiya dekabrın 10-dan stansiyanın istismarını dayandırmışdır. 1984-cü ildə SSRİ-nin raket əleyhinə müdafiə sistemi kimi inşa edilmiş Qəbələ RLS  6 min kilometr radiusda ballistik raketlərin buraxılışını izləməyə imkan verir.

2002-ci ildə imzalanmış sazişə müvafiq olaraq, Rusiya RLS-in icarəsinə görə Azərbaycana ildə 7 milyon dollar ödəmişdir.