APA-nın məlumatına görə, bunu Dini Qurumlarla İş üzrə Dövlət Komitəsinin keçirdiyi “Dövlət və din: Dəyişən dünyada tolerantlığın gücləndirilməsi” I Beynəlxalq Bakı Forumunda çıxışında Azərbaycan Alban-Udin Xristian Dini İcmasının sədri Robert Mobili deyib.

O bildirib ki, Rusiya və Qacar səltənəti arasında olan müharibə bölgədə, əsasən də Qafqaz Alban-Udin İcması üçün kataklizmlərlə yadda qalıb. Udinlərin bölgənin qədim şərqi xristianları olduğunu xatırladan R. Mobili qeyd edib ki, Çar Rusiyasının bölgədəki siyasəti albanların dini-milli hüquqlarını pozmaqla yanaşı, onların tarixi keçmişinin saxtalaşdırılması ilə nəticələnib: “Rusiya çarlarının Qafqazdakı siyasəti, ermənilərə verdikləri önəm nəticəsində alban kilsələrinin mərkəzi əsassız olaraq ermənilərin Qriqoryan kilsəsinə verildi. Bununla da alban dini rəhbərliyi Eçmiədzinə köçürüldü.

Həmin qərardan sonra çoxlu sayda alban-xristian kilsələri və abidələri həm Qarabağda, həm də indiki Ermənistan ərazisində erməniləşdirildi, yaxud da dağıdıldı. Bu gün onlarla alban-xristian məbədi işğal altındadır”.

R.Mobili deyib ki, uzun əsrlər boyu xristian və müsəlman din xadimləri yadellilərə qarşı birgə mübarizə aparıblar: “Bugünkü Azərbaycan dini-milli tolerantlığına görə dünyanın, demək olar, bütün ölkələri üçün nümunə ola bilər”.