Astanada keçirilən tolerantlıq və ayrı-seçkiliyə yol verilməməsi üzrə ATƏT-in yüksək səviyyəli konfransı çərçivəsində Avropa Şurası Parlament Assambleyasının (AŞPA) sədri jurnalistlərin suallarına cavab verərkən bildirmişdir ki, AŞPA Ermənistan və Azərbaycanın mövqelərinin yaxınlaşmasına bundan sonra da yardım edəcəkdir. Onun sözlərinə görə, qurumda Dağlıq Qarabağ üzrə altkomitənin fəaliyyətinin bərpa edilməsi istiqamətində iş davam etdiriləcəkdir.
O demişdir ki, 2005-ci ildə AŞPA-da Dağlıq Qarabağ üzrə altkomitənin yaradılması üçün qətnamə qəbul olunmuş, ancaq altkomitənin sədri olan lord Rassel Conson rəhmətə getdiyi üçün altkomitənin fəaliyyəti dayandırılmışdır. Bu məsələ büronun gündəliyindədir.
Mövlud Çavuşoğlu demişdir: "Rəhbərlik etdiyim qurumda AŞPA-nın oktyabr sessiyası ərzində Azərbaycan və Ermənistan nümayəndə heyətləri arasında görüşləri davam etdirmək fikrindəyik. Bu münaqişənin həlli ilə ATƏT-in Minsk qrupu məşğul olur və fikrimcə, bu qrup münaqişənin həlli istiqamətində daha qəti addımlar atmalıdır".{nl}

Qulu KƏNGƏRLİ AzərTAc-ın xüsusi müxbiri
Astana