Dekabrın 17-də Naxçıvan Muxtar Respublikası Ali Məclisinin sədri Vasif Talıbov Ərzurum Atatürk Universitetinin rektoru, professor Hikmət Koçakın rəhbərlik etdiyi nümayəndə heyəti ilə görüşmüşdür.

Ali Məclisin sədri demişdir ki, Azərbaycan-Türkiyə dostluq və qardaşlığı təhsil və elm sahəsində qurulan körpülərlə daha da möhkəmləndirilir. İstər Türkiyənin yaxın bölgələri, istərsə də bu bölgələrin universitetləri ilə qurulan əlaqələr regionun tərəqqisi, yüksək ixtisaslı kadrların hazırlanması baxımından mühüm əhəmiyyət kəsb edir. Ərzurum Atatürk Universiteti ilə Naxçıvan Dövlət Universiteti arasında qurulan əlaqələr də yüksələn xətlə inkişaf edərək getdikcə daha da möhkəmlənir.

Ali Məclisin sədri Ərzurum Atatürk Universitetinin rektoru Hikmət Koçakın universitetlərarası əlaqələrin qurulması və inkişafındakı fəaliyyətini yüksək qiymətləndirmiş, onu Naxçıvan Dövlət Universitetinin fəxri doktoru adına layiq görülməsi münasibətilə təbrik etmişdir.

Nümayəndə heyətinə göstərilən diqqətə və səmimi münasibətə görə minnətdarlığını bildirən Hikmət Koçak Naxçıvana keçənilki səfərini xatırladaraq demişdir ki, ötən müddətdə muxtar respublikada quruculuq işləri davam etmiş, təhsil infrastrukturunun müasirləşməsi istiqamətində uğurlu addımlar atılmışdır. Bu, sürətlə inkişaf edən Naxçıvan Dövlət Universitetinin timsalında da özünü göstərir. Yaradılan şərait imkan verir ki, Naxçıvan Dövlət Universiteti ilə Türkiyənin ali təhsil ocaqları öz potensiallarını birləşdirərək uğurlu nəticələr əldə etsinlər.

Görüşdə elm-təhsil sahəsində əlaqələrin hazırkı vəziyyəti və perspektivləri ətrafında fikir mübadiləsi aparılmışdır.

Türkiyənin Naxçıvandakı baş konsulu Cenk Ünal görüşdə iştirak etmişdir.

AzərTAc