Dekabrın 13-də Naxçıvan Muxtar Respublikası Ali Məclisinin sədri Vasif Talıbov Koreya Respublikasının Azərbaycandakı səfiri Çoi Suk-İnlə görüşmüşdür.

Ali Məclisin sədri Koreya Respublikası ilə Azərbaycan arasında diplomatik münasibətlərin qurulduğu 20 il ərzində əlaqələrin yüksələn xətlə inkişaf etdiyini söyləmişdir.

Ali Məclisin sədri demişdir ki, Azərbaycan-Koreya münasibətlərinin genişlənməsində Naxçıvan Muxtar Respublikasının da özünəməxsus yeri və rolu olmuşdur. Koreya ilə Naxçıvan arasında qarşılıqlı faydalı əməkdaşlıq əlaqələri inkişaf edərək yeni mərhələyə yüksəlmişdir. Naxçıvan Dövlət Universiteti ilə Koreyanın qabaqcıl universitetləri arasında qurulan əlaqələr, Koreya şirkətləri tərəfindən universitetdə həyata keçirilən layihələr əməkdaşlığın inkişafının daha bir göstəricisidir.

Ali Məclisin sədri səfirin ölkəmizdəki diplomatik fəaliyyəti dövründə Azərbaycan, eləcə də Naxçıvan Muxtar Respublikası ilə əlaqələrin daha da inkişaf etdirilməsi istiqamətində səylərini əsirgəməyəcəyinə əminliyini bildirmişdir.

Göstərilən diqqətə və səmimi münasibətə görə minnətdarlıq edən səfir Çoi Suk-İn Azərbaycan-Koreya əlaqələrinin inkişafında dövlət başçıları səviyyəsində həyata keçirilən qarşılıqlı səfərlərin xüsusi yer tutduğunu bildirmişdir. Ölkəmizdəki diplomatik fəaliyyəti dövründə əlaqələrin daha da inkişaf etdirilməsinə çalışacağını  bildirən qonaq muxtar respublikada əldə edilən inkişafı uğurlu sosial-iqtisadi siyasətin nəticəsi kimi dəyərləndirmişdir.

Görüşdə qarşılıqlı maraq doğuran məsələlər ətrafında fikir mübadiləsi aparılmışdır.

AzərTAc