Türkiyənin Baş naziri Rəcəb Tayyib Ərdoğan "G-20" liderlərinin Torontoda keçirilmiş zirvə görüşü çərçivəsində Rusiya Prezidenti Dmitri Medvedevlə Dağlıq Qarabağ münaqişəsinin həlli məsələsini müzakirə etdiyini bildirmişdir.
Rəcəb Tayyib Ərdoğan demişdir ki, Dmitri Medvedev Azərbaycan və Ermənistan prezidentlərinin görüşünü xatırlatmış və bu görüşü ümidləri bir az da artıran müsbət bir müzakirə kimi dəyərləndirmişdir. Türkiyə də bu ümidlərin tezliklə konkret bir nəticə ilə yekunlaşacağına və münaqişənin həllinə nail olunacağına inanır.
Rəcəb Tayyib Ərdoğan ATƏT-in Minsk qrupunun həmsədri olan ölkələrin prezidentlərinin Dağlıq Qarabağ probleminin həlli ilə bağlı bəyanatını da müsbət qiymətləndirmiş, bu səylərin münaqişənin nizama salınmasını sürətləndirəcəyini vurğulamışdır.

Oqtay BAYRAMOV AzərTAc-ın xüsusi müxbiri
Ankara