Azərbaycanda siyasi partiyalara dövlət maliyyəsinin ayrılması çox təqdirəlayiq haldır. Bu fikirləri hakim Yeni Azərbaycan Partiyasının saytına açıqlamasında YAP icra katibinin müavini, Milli Məclisin deputatı Mübariz Qurbanlı demişdir.

“Ümumiyyətlə, partiyaların dövlət büdcəsindən maliyyə alması təcrübəsi başqa ölkələrdə də var. Azərbaycanın da sosial-iqtisadi imkanlarının artması siyasi partiyalara dövlət büdcəsindən yardım ayrılmasına imkan verib”, - deyə Mübariz Qurbanlı əlavə etmişdir.

Millət vəkili bildirmişdir ki, dövlət büdcəsindən ayrılan 2,5 milyon manat vəsait siyasi partiyaların inkişafına dəstək verəcək. Bu maliyyə partiyaların cari xərclərinə sərf olunacaq. Onun sözlərinə görə, müvafiq qanunvericilik siyasi partiyaların maliyyə mənbələrini göstərir. Bura dövlət yardımı ilə yanaşı, üzvlük haqları, müxtəlif mənbələrdən alınan ianələr və s. daxildir.

“Bu baxımdan, büdcədən ayrılan vəsait heç də üzvlük haqlarının toplanmasını dayandırmayacaq. Dövlətin ayırdığı yardım indiki şəraitdə siyasi partiyaların bəzi cari xərclərini ödəmək üçün də istifadə olunacaq. Bu vəsait partiyaların fəaliyyətinə, təşkilatlanmasına və inkişafına kömək göstərəcək. YAP ölkəmizin ən aparıcı partiyası kimi özünün maliyyə xərclərini ödəməyə qadirdir. Partiyamız dövlət vəsaitini isə qanunvericiliyə uyğun şəkildə istifadə edəcək. Hesab edirəm ki, digər siyasi partiyalar da büdcədən ayrılan vəsaitdən özlərinin inkişafı ilə yanaşı, cəmiyyət üçün faydalı olan məsələlərə də sərf etməlidirlər” - deyəYAP icra katibinin müavini vurğulamışdır.