Naxçıvan Muxtar Respublikası Ali Məclisinin sədri Vasif Talıbov Culfanın bir neçə kəndində inşa olunan sosial obyektlərin tikintisi ilə tanış olmuşdur.

Culfa rayonunun Gülüstan kənd sakini, birinci qrup əlil Arif Zamanov üçün üçotaqlı, Boyəhməd kənd sakini, üçüncü qrup Vətən müharibəsi əlili Vüqar Yunisov üçün ikiotaqlı fərdi ev tikilmişdir.

Ali Məclisinin sədri Vasif Talıbov evlərin orderlərini təqdim etmiş, onlara yeni mənzillərində xoş günlər arzulamışdır.

Mənzillərdə hər cür məişət şəraiti yaradılmış, həyətlərdə abadlıq işləri aparılmış, içməli su xətti çəkilmişdir.

Sonra Ali Məclisinin sədri Vasif Talıbov Əbrəqunus kəndinə gəlmiş, məscid binasında aparılan tikinti işləri ilə maraqlanmışdır. Bildirilmişdir ki, məscid binasında əsas tikinti işləri başa çatdırılmışdır. Hazırda həyətdə abadlıq işləri aparılır.

Teyvaz kəndində aparılan tikinti işlərinin gedişi ilə də tanış olan Ali Məclisin sədrinə məlumat verilmişdir ki, kənd tam orta məktəbi üçün inşa olunan bina 110 şagird yerlik məktəb binasında hörgü və beton işləri aparılır.

İki mərtəbədən ibarət olan kənd mərkəzinin binasının tikintisi də sürətlə aparılır.

Ali Məclisin sədri kəndin sosial iqtisadi inkişafı və əhalinin məşğulluğu ilə də maraqlanmışdır. Sakinlər kənddə aparılan quruculuq işlərinə görə minnətdarlıq etmişlər.