Azərbaycanın Xarici İşlər Nazirliyi Qəbələ Radiolokasiya Stansiyasının (RLS) istismarının dayandırılması ilə bağlı dekabrın 10-da bəyanat yaymışdır.

Xarici İşlər Nazirliyinin mətbuat xidmətindən  daxil olmuş bəyanatda bildirilir: “Azərbaycan Respublikası ilə Rusiya Federasiyası arasında Qəbələ RLS ilə əlaqədar intensiv danışıqlar aparılmışdır.

Azərbaycan Respublikası danışıqlarda Qəbələ RLS-in icarə müddətinin uzadılması ilə bağlı Rusiya tərəfi ilə əməkdaşlığı davam etdirməyə hazır olduğunu nümayiş etdirmişdir. Danışıqlar zamanı adıçəkilən stansiyanın icarə haqqı ilə bağlı razılaşmanın əldə edilməsi mümkün olmamışdır.

“Azərbaycan Respublikası Hökuməti və Rusiya Federasiyası Hökuməti arasında Qəbələ RLS-in statusu, istifadə prinsipləri və şərtləri haqqında Saziş”in 2012-ci il 9 dekabr tarixindən qüvvədən düşməsi ilə bağlı Rusiya Federasiyası tərəfindən stansiyanın istismarının 2012-ci il dekabrın 10-dan etibarən dayandırılması barədə Azərbaycan tərəfinə nota təqdim edilmişdir.