Dublində ATƏT Xarici İşlər Nazirləri Şurasının növbəti toplantısı çərçivəsində GUAM Xarici İşlər Nazirləri Şurasının 20-ci iclası keçirilmişdir.

Xarici İşlər Nazirliyinin mətbuat xidmətindən AzərTAc-a bildirmişlər ki, nazir Elmar Məmmədyarovun sədrliyi ilə keçirilən iclasda Gürcüstanın, Ukraynanın xarici siyasət idarələrinin rəhbərləri Maya Pancikidze, Konstantin Qrişenko, Moldovanın xarici işlər və Avropaya inteqrasiya naziri Yuri Lyanke və GUAM-ın baş katibi Valeri Çeçelaşvili iştirak etmişlər.

İclasda siyasi əməkdaşlıq məsələləri, o cümlədən BMT-nin  “GUAM məkanında həlli uzadılmış münaqişələr və onların beynəlxalq sülh, təhlükəsizlik və inkişaf üçün nəticələri” adlı qətnamə layihəsi təşkilatın əsas tərəfdaş nümayəndə heyətləri ilə müzakirələrin aparılması məqsədilə razılaşdırılmışdır. Həmçinin BMT Baş Məclisinin cari sessiyasında “BMT və GUAM arasında əməkdaşlıq” adlı qətnamə layihəsinin irəli sürülməsinin gedişi müzakirə olunmuşdur.

İclasda mədəniyyət, elm və təhsil, turizm sahələrində əməkdaşlıq məsələləri ətrafında fikir mübadiləsi aparılmışdır. Bu il dekabrın 19-20 -də Bakıda keçiriləcək GUAM Parlament Assambleyasının növbəti plenar iclasına hazırlıq məsələləri iclasın gündəliyinə daxil edilmişdir.

GUAM-ın tərəfdaş ölkələr və digər beynəlxalq təşkilatlarla əməkdaşlıq münasibətləri də müzakirə edilən məsələlər sırasında olmuşdur.