Macarıstanda səfərdə olan Yeni Azərbaycan Partiyası sədrinin müavini, partiyanın icra katibi, Milli Məclisin üzvü Əli Əhmədov Macarıstanın hakim “Fides” Partiyası sədrinin birinci müavini (partiyanın sədri ölkənin baş naziri Viktor Orbandır), Debretsen şəhərinin meri, Macarıstan parlamentinin üzvü Koşa Layoş ilə görüşüb.

Azərbaycanın Macarıstandakı səfirliyindən APA-ya verilən məlumata görə, görüş zamanı iki hakim partiya və onların gənclər təşkilatları arasında münasibətlərin daha da genişləndirilməsi, ikitərəfli və çoxtərəfli müstəvidə parlament fəaliyyətinin əlaqələndirilməsi barəsində fikir mübadiləsi aparılıb.

Tərəflər yaxın zamanlarda Yeni Azərbaycan Partiyası ilə “Fides” arasında əməkdaşlıq sazişinin hazırlanması və imzalanması barəsində razılıq əldə ediblər. Hər iki partiyanın gənclər təşkilatlarının Azərbaycanda və Macarıstanda təşkil olunan “yay məktəblərində” iştirakı məsələsi də məmnunluqla qarşılanıb. Partiyalararası dialoqu davam etdirmək məqsədilə YAP sədrinin müavini Əli Əhmədov Koşa Layoş başda olmaqla “Fides” partiyasının nümayəndə heyətini Azərbaycana səfərə dəvət edib. Dəvət məmnunluqla qəbul olunub.

Azərbaycanın Macarıstandakı səfiri Vilayət Quliyev və YAP icra katibinin müavini, Milli Məclisin deputatı Mübariz Qurbanlı görüşdə iştirak ediblər.