Azərbaycanda səfərdə olan Latın Amerikası ölkələrinin gənclərindən ibarət nümayəndə heyəti noyabrın 23-də Azərbaycan Diplomatik Akademiyasında (ADA) olmuşlar. ADA-dan AzərTAc-a bildirmişlər ki, Kolumbiya, Kosta-Rika, Meksika və Panamanı təmsil edən 43 nəfər gənc Akademiya ilə yaxından tanış olmuşlar.
Latın Amerikası ölkələrinin gəncləri Akademiyanın yeni tikilmiş tədris mərkəzi, ADA-da nümayiş etdirilən "Azərbaycan diplomatiyasının tarixi" adlı sərgi, ingilis dilli kataloqla zəngin kitabxana və təhsil prosesi ilə tanış olmuşlar.
ADA-nın ictimai və beynəlxalq məsələlər məktəbinin dekanı Anar Vəliyev "Azərbaycan xarici siyasətinin prioritetləri" mövzusunda mühazirə ilə çıxış etmişdir. A.Vəliyev Cənubi Qafqaz və Xəzər hövzəsinin bir hissəsi olan ölkəmizin müstəqilliyini bərpa etdikdən sonra dövlət quruculuğunda qət etdiyi yol, əldə olunan nailiyyətlər, Azərbaycan Prezidenti İlham Əliyevin rəhbərliyi ilə aparılan xarici siyasət kursunun əsas istiqamətləri barədə ətraflı məlumat vermişdir.
Latın Amerikası ölkələrindən olan gənclərə, həmçinin ADA-nın son beş illik fəaliyyəti, təqdim edilən akademik proqramlar və tələbəlik həyatı barədə məlumat verilmişdir.
Latın Amerikası ölkələrinin gənclərindən ibarət nümayəndə heyətinin Azərbaycana səfəri "Azərbaycan gəncliyi 2011-2015-ci illərdə" Dövlət Proqramı çərçivəsində həyata keçirilir.
AzərTAc