Azərbaycan Respublikasının Baş naziri Artur Rasizadə noyabrın 23-də Asiya Siyasi Partiyaları Beynəlxalq Konfransının (İCAPP) VII Baş Assambleyasında iştirak edən nümayəndələrin bir qrupu ilə görüşmüşdür. 
Baş nazir İCAPP-ın VII Baş Assambleyasının Bakıda keçirilməsini Azərbaycanın siyasi həyatında önəmli hadisə adlandırmışdır. İştirakçıların bu mühüm tədbir vasitəsilə həm də respublikamızla tanış olma fürsətlərini dəyərləndirən Baş nazir bundan sonrakı qərarların qəbul olunması prosesində daha çox obyektivlik nümayiş olunacağına əminlik ifadə etmişdir.
Azərbaycanın bugünkü iqtisadi həyatı barədə məlumat verən Artur Rasizadə bütün uğurların əldə olunmasında Prezident İlham Əliyevin uzaqgörən siyasətinin, həmçinin onun rəhbərlik etdiyi Yeni Azərbaycan Partiyasının rolunun danılmaz olduğunu bir daha xatırlatmışdır.
Ermənistan-Azərbaycan, Dağlıq Qarabağ münaqişəsi barədə məlumat verən Artur Rasizadə söyləmişdir ki, bu problem yalnız beynəlxalq hüquq normalarına uyğun olaraq Azərbaycanın ərazi bütövlüyü çərçivəsində həll edilməlidir.
İCAPP-ın təsisçisi, qurumun icraçı sədri və Daimi Komitəsinin həmsədri, Filippin parlamentinin keçmiş sədri Xose de Venesia VII Baş Assambleyanın əhəmiyyətini vurğulayaraq yüksək səviyyəli təşkilatçılıq üçün ölkə rəhbərliyinə təşəkkürünü bildirmişdir. O, bu konfransı Asiya siyasi partiyalarının görüşlərinin tarixində baş verən əhəmiyyətli tədbir kimi qiymətləndirmişdir. Xose de Venesia Azərbaycanın Prezident İlham Əliyevin rəhbərliyi ilə böyük nailiyyətlər əldə etdiyini vurğulamış, bunun ən bariz göstəricisi kimi əhalinin rifah səviyyəsinin artması və yoxsulluğun minimuma endirilməsi faktını diqqətə çatdırmışdır.
Görüşdə qarşılıqlı maraq doğuran məsələlər barədə fikir mübadiləsi aparılmışdır.

AzərTAc