Noyabrın 19-da Naxçıvanın Ordubad rayonunun Behrud və Biləv kəndlərində yeni xidmət mərkəzləri açılmışdır.
Naxçıvan Muxtar Respublikası Ali Məclisinin sədri Vasif Talıbov xidmət mərkəzlərinin istifadəyə verilməsi münasibətilə sakinləri təbrik etmiş, binaların açılışını bildirən lenti kəsmişdir.
Məlumat verilmişdir ki, xidmət mərkəzlərində bərbərxana, qadınlar üçün gözəllik salonu, ət satışı yeri, təsərrüfat və ərzaq mağazaları fəaliyyət göstərir. On nəfərin işlə təmin olunduğu mərkəzlərdə sakinlərə yüksək səviyyədə məişət xidməti göstəriləcəkdir.
Xidmət mərkəzləri ilə tanışlıqdan sonra sakinlərlə görüşən Ali Məclisin sədri demişdir ki, kəndlərin sosial-iqtisadi və mədəni inkişafı ölkəmizdə həyata keçirilən sosial siyasətin əsas tərkib hissəsidir. Bu gün ölkəmizdə istər mərkəz, istərsə də ucqar bölgələrdə bütün yaşayış məntəqələrinin inkişafına, infrastrukturun yenilənməsinə eyni dərəcədə diqqət göstərilir.
Behrud və Biləv kəndlərində tikilən yeni sosial obyektlər, çəkilən yollar ölkəmizin inkişafının kəndlərimizin timsalında daha bir ifadəsi olmaqla yanaşı, kəndlə şəhər arasındakı fərqin aradan qaldırılması istiqamətində atılan növbəti addımdır.
Sakinlər muxtar respublikanın bütün bölgələrini əhatə edən tikinti-quruculuq və abadlıq işlərini ölkəmizdə ulu öndər Heydər Əliyevin siyasi kursunun uğurla davam etdirilməsinin nəticəsi kimi dəyərləndirmiş, göstərilən qayğıya görə minnətdarlıq etmişlər.