Noyabrın 15-də Naxçıvan Muxtar Respublikası Ali Məclisinin sədri Vasif Talıbov ATƏT-in Bakı ofisinin rəhbəri Koray Tarqayın başçılıq etdiyi nümayəndə heyəti ilə görüşmüşdür.
Qonaqları salamlayan Ali Məclisin sədri Koray Tarqayın Naxçıvana ötənilki səfərini xatırlatmış, bu müddətdə ATƏT-in Bakı ofisi ilə muxtar respublika arasında əlaqələrin yüksələn xətlə inkişafından məmnunluğunu bildirmişdir. Vasif Talıbov vurğulamışdır ki, müxtəlif sahələr üzrə qurulan səmərəli əməkdaşlıq, həyata keçirilən birgə layihələr əlaqələrin inkişafı baxımından əhəmiyyətlidir.
"Bu gün ölkəmizdə iqtisadi, siyasi və demokratik inkişaf paralel şəkildə aparılır", - deyən Ali Məclisin sədri Naxçıvan Muxtar Respublikasının da nüfuzlu beynəlxalq təşkilatlarla qarşılıqlı faydalı əməkdaşlıq əlaqələrinin genişləndiyini qeyd etmiş, ATƏT-in Bakı ofisi ilə işbirliyinin bundan sonra da səmərəli olacağına əminliyini bildirmişdir.
Azərbaycanda vətəndaş cəmiyyəti quruculuğu istiqamətində qazanılan nailiyyətləri və bütün sahələri əhatə edən zəngin qanunvericilik bazasının yaradılmasını yüksək qiymətləndirən Koray Tarqay Naxçıvanın müvafiq dövlət orqanları və təhsil müəssisələri ilə əməkdaşlıq əlaqələrinin əhəmiyyətini vurğulamışdır. ATƏT-in Bakı ofisinin rəhbəri həyata keçirilən birgə layihələr çərçivəsində bir sıra təlim və seminarların təşkil edildiyini bildirmiş, 2013-cü ildə də əməkdaşlıq əlaqələrinin konkret tədbirlər planı üzrə davam etdiriləcəyini qeyd etmişdir.
Görüşdə qarşılıqlı maraq doğuran məsələlər ilə bağlı fikir mübadiləsi aparılmışdır.
AzərTAc