Noyabrın 13-də Azərbaycanın xarici işlər naziri Elmar Məmmədyarov Almaniya Xarici İşlər Nazirliyinin dövlət katibi xanım Kornelia Piperin başçılıq etdiyi nümayəndə heyəti ilə görüşmüşdür.  
Nazirliyin mətbuat xidmətindən AzərTAc-a bildirmişlər ki, Elmar Məmmədyarov qonağı ölkəmizdə salamlamış və iki ölkə arasında müxtəlif sahələrdəki mövcud münasibətlərdən məmnunluğunu bildirmişdir. Əlaqələrimizin daha da inkişaf etdirilməsi üçün böyük potensialın olduğunu diqqətə çatdıran nazir bu günlərdə Bakıda fəaliyyətə başlamış Alman-Azərbaycan Ticarət Palatasının iki ölkənin işgüzar dairələri arasında əməkdaşlığın genişlənməsinə töhfə verəcəyini vurğulamışdır.
Ermənistan-Azərbaycan, Dağlıq Qarabağ münaqişəsi haqqında qonağa məlumat verən E.Məmmədyarov mövcud status-kvonun qəbuledilməz olduğunu bildirmişdir. Nazir münaqişənin həlli üçün Ermənistan hərbi qüvvələrinin Azərbaycanın işğal altındakı torpaqlarından çıxarılmasının zəruriliyini diqqətə çatdırmışdır.
Xanım Kornelia Piper səmimi qəbula görə təşəkkür etmiş, ölkəmizdə müşahidə etdiyi dinamik inkişafın onda dərin təəssürat yaratdığını söyləmiş, Azərbaycan-Almaniya münasibətlərinin mövcud səviyyəsindən məmnunluğunu bildirmişdir. Azərbaycanın geostrateji əhəmiyyətini vurğulayan dövlət katibi Almaniyanın ölkəmiz ilə müxtəlif sahələrdə, o cümlədən təhsil və texnologiya sahələrində əməkdaşlığı genişləndirməkdə maraqlı olduğunu qeyd etmişdir.
Görüşdə maraq doğuran regional və beynəlxalq məsələlər ətrafında fikir mübadiləsi aparılmışdır.
AzərTAc