Oktyabrın 31-də Naxçıvan Muxtar Respublikası Ali Məclisinin sədri Vasif Talıbov Amerika Birləşmiş Ştatlarının Azərbaycandakı səfiri Riçard Morninqstar ilə görüşmüşdür.
AzərTAc xəbər verir ki, qonağı salamlayan Ali Məclisin sədri onu Azərbaycanın Naxçıvan Muxtar Respublikasında görməkdən məmnunluğunu bildirmişdir.
Ali Məclisin sədri Riçard Morninqstarın Azərbaycan-ABŞ münasibətlərinin inkişafındakı xidmətlərini qeyd etmiş, onun Bakı-Tbilisi-Ceyhan və digər mühüm iqtisadi və enerji layihələrinin reallaşmasındakı fəaliyyətini yüksək qiymətləndirmişdir.
Azərbaycan Respublikası ilə Amerika Birləşmiş Ştatları arasında ikitərəfli əlaqələrin inkişaf etdiyini deyən Ali Məclisin sədri Riçard Morninqstarın diplomatik fəaliyyəti dövründə bu münasibətlərin daha da möhkəmlənəcəyinə əminliyini bildirmişdir.
Amerika Birləşmiş Ştatlarının ölkəmizdəki səfiri göstərilən səmimi münasibətə görə minnətdarlıq etmiş və demişdir ki, blokada şəraitində yaşamasına baxmayaraq, mühüm nailiyyətlər əldə edən Naxçıvan Muxtar Respublikasının hərtərəfli inkişafı məmnunluq doğurur.
Səfir Naxçıvan Muxtar Respublikasına səfərinin əsas məqsədinin mövcud əməkdaşlıq əlaqələrini genişləndirməkdən və inkişaf perspektivlərini müzakirə etməkdən ibarət olduğunu vurğulamışdır.
Görüşdə əlaqələrin hazırkı vəziyyəti və perspektivləri ətrafında fikir mübadiləsi aparılmışdır.
Qonaq Naxçıvan Muxtar Respublikasına ikigünlük səfəri çərçivəsində bir sıra görüşlər keçirəcək, tarix və mədəniyyət abidələri, təhsil müəssisələri ilə tanış olacaqdır.