Seçkidən əvvəl bəzi siyasi partiyalar və ya onların funksionerləri mütəmadi olaraq seçkilərin saxtalaşdırılması ilə bağlı ictimai rəyi çaşdıran, o cümlədən beynəlxalq ictimaiyyətdə Azərbaycan seçkiləri haqqında mənfi rəy formalaşdıran fikirlər səsləndirirlər. Açığını deyim ki, biz bunlardan məyus oluruq.
Bu sözləri Prezident Administrasiyası ictimai-siyasi məsələlər şöbəsinin müdiri Əli Həsənov jurnalistlərə açıqlamasında demişdir.
Belə fikirlərin heç bir əsası olmadığını vurğulayan Əli Həsənov qeyd etmişdir ki, bu addımlar Azərbaycanda seçki praktikasının təkmilləşdirilməsi, seçki institutlarının fəaliyyətinin yaxşılaşdırılmasına yönəlmiş tədbirlərlə uyğunsuzluq təşkil edir.
Şöbə müdiri bildirmişdir ki, Seçki Məcəlləsinə uyğun olaraq beynəlxalq təşkilatlarla əməkdaşlıq şəraitində bu il Azərbaycanda parlament seçkiləri açıq, şəffaf və ədalətli keçiriləcəkdir. Seçkilərdə iştirak etmək istəyən hər bir namizədin, siyasi partiyanın, ictimai qurumun hüquqları təmin olunacaqdır. Seçki prosesinin şəffaflığının təmini üçün bütün müşahidə institutlarının, qrupların fəaliyyətinə hər cür şərait yaradılacaqdır.
AzərTAc