Oktyabrın 21-də Azərbaycanın İordaniyadakı səfiri Sabir Ağabəyov ilə bu ölkənin xarici işlər naziri Nasser Cudeh arasında görüş keçirilmişdir.
Azərbaycanın İordaniyadakı səfirliyindən AzərTAc-a bildirmişlər ki, dostluq və qarşılıqlı anlaşma şəraitində keçən görüşdə uğurla inkişaf edən ikitərəfli əlaqələrin müsbət dinamikası qeyd edilmiş, dövlət başçıları arasında yaranan xoş münasibətlərin xalqlarımızın əməkdaşlığının gələcək inkişafına mühüm töhfə verəcəyi xüsusi vurğulanmışdır.
Nazir son illərdə İordaniya ilə Azərbaycan arasında ikitərəfli münasibətlərin uğurla inkişaf etdiyini, yüksək səviyyədə səmərəli görüşlərin keçirildiyini və güclü tərəfdaşlıq prinsiplərinə əsaslanan əlaqələrimizin genişləndiyini vurğulamış, əməkdaşlığın bundan sonra da möhkəmlənəcəyinə əminlik ifadə etmişdir.
Görüşdə Ermənistanın Azərbaycan Respublikasının hava məkanından və mülki aviasiya infrastrukturundan qeyri-qanuni istifadə, o cümlədən Xocalı hava limanına uçuşlar təşkil etmək cəhdinin mülki aviasiya təhlükəsizliyinə və regiondakı vəziyyətə mənfi təsir göstərəcəyi xüsusi vurğulanmışdır. Ermənistanı beynəlxalq hüquq normalarına zidd olan bu niyyətdən daşındırmaq məqsədi ilə İordaniya tərəfinə müraciət edilmiş və bununla əlaqədar rəsmi nota təqdim olunmuşdur.
N.Cudeh qısa müddətdə İordaniyanın bu məsələyə dair münasibət bildirəcəyini vəd etmişdir.
Daha sonra qarşı tərəfə Azərbaycanın xarici işlər naziri E.Məmmədyarovun adından N.Cudehin yenidən xarici işlər naziri təyin edilməsi və Qurban bayramı münasibətilə təbrik, habelə ölkəmizə səfərə dəvət məktubu təqdim edilmişdir.
N.Cudeh dəvəti böyük məmnuniyyətlə qəbul etmiş və yaxın zamanlarda Bakını ziyarət edəcəyini diqqətə çatdırmışdır.