İyunun 22-də Mərkəzi Seçki Komissiyasının (MSK) sədri Məzahir Pənahov Nikolas Kaçarovskinin rəhbərlik etdiyi ATƏT-in Demokratik Təsisatlar və İnsan Hüquqları Bürosunun seçkiqabağı qiymətləndirmə missiyası ilə görüşmüşdür.
MSK-nın mətbuat xidmətindən bildirmişlər ki, sədr Mərkəzi Seçki Komissiyasının beynəlxalq qurumlarla, xüsusən də ATƏT-lə əlaqələrə önəm verdiyini vurğulamış və qarşıdan gələn seçkilərdə də sıx əməkdaşlıq edəcəklərini diqqətə çatdırmışdır.
Missiyanın üzvləri seçki komissiyalarının təşkili və iş prinsipləri, MSK-nın seçkiyə hazırlıq çərçivəsində gördüyü işlər və gələcək fəaliyyət istiqamətləri ilə maraqlanmışlar.
MSK-nın sədri seçki orqanlarının fəaliyyəti, qarşıdan gələn seçkilərlə bağlı Komissiyanın gördüyü işlər və həyata keçirəcəyi layihələr barədə ətraflı məlumat vermişdir. O, seçici siyahılarının yanvar ayının əvvəllərindən başlamış dəqiqləşdirilməsinin mayın sonunda başa çatdırıldığını vurğulayaraq, bu prosesin davam etdiriləcəyini bildirmişdir. M.Pənahov qeyd etmişdir ki, Mərkəzi Seçki Komissiyası aşağı seçki komissiyalarının fəaliyyətinin monitorinqini aparmış və seçki prosesinin ayrı-ayrı mərhələləri ilə bağlı normativ aktlar hazırlamışdır. İyul ayından etibarən isə dairə və məntəqə seçki komissiyalarının üzvləri, eyni zamanda, digər subyektlər üçün maarifləndirmə layihələrinin həyata keçirilməsinə başlanacaqdır. Bu tədbirlərin hazırlanıb keçirilməsində beynəlxalq qurumlarla sıx əməkdaşlıq edildiyi də qeyd olunmuşdur.
Görüşdə qarşıdan gələn parlament seçkiləri ilə bağlı Mərkəzi Seçki Komissiyası ilə ATƏT arasında gələcək əməkdaşlığın perspektivləri barədə də müzakirələr aparılmışdır.
AzərTAc{nl}