Oktyabrın 8-də Naxçıvan Muxtar Respublikası Ali Məclisinin sədri Vasif Talıbov Türkiyə Respublikasının ölkəmizə yeni təyin olunmuş səfiri İsmail Alper Coşkun ilə görüşmüşdür.
Ali Məclisin sədri səfiri salamlamış, onu ölkəmizdə diplomatik fəaliyyətə başlaması münasibətilə təbrik edərək demişdir: "Azərbaycan-Türkiyə dostluq və qardaşlığı böyük inkişaf yolu keçərək strateji tərəfdaşlıq səviyyəsinə yüksəlmişdir. Qardaş ölkələrimiz arasındakı tarixi zəminə əsaslanan yüksək münasibətlər istər regional, istərsə də nüfuzlu beynəlxalq təşkilatlar çərçivəsində də özünü göstərir, mühüm əhəmiyyətə malik olan iqtisadi layihələr reallaşdırılır".
Ali Məclisin sədri İsmail Alper Coşkunun Azərbaycan-Türkiyə münasibətlərinin daha da inkişafı istiqamətində səylərini əsirgəməyəcəyinə əminliyini bildirmiş, ona ölkəmizdəki diplomatik fəaliyyətində uğurlar arzulamışdır.
Səmimi görüşə görə minnətdarlıq edən İsmail Alper Coşkun qardaş Azərbaycanda özünü Türkiyədəki kimi hiss etdiyini bildirmişdir. Səfir demişdir ki, Türkiyə ilə Azərbaycan arasında olan qarşılıqlı inam və etibar, strateji tərəfdaşlıq əlaqələrinin dərinləşməsi böyük məmnunluq doğurur.
Bu əlaqələrdə Naxçıvan Muxtar Respublikasının əhəmiyyətli yerini qeyd edən qonaq Azərbaycandakı diplomatik fəaliyyəti müddətində ölkələrimiz arasında ikitərəfli münasibətlərin daha da genişləndirilməsi istiqamətində səylərini əsirgəməyəcəyini bildirmişdir.
Görüşdə əlaqələrin hazırkı vəziyyəti və perspektivləri ətrafında geniş fikir mübadiləsi aparılmışdır.
Türkiyə Respublikasının Naxçıvandakı baş konsulu Cenk Ünal görüşdə iştirak etmişdir.

AzərTAc