İyunun 22-də Yeni Azərbaycan Partiyasının (YAP) mənzil qərargahında YAP sədrinin müavini-icra katibi, Milli Məclisin deputatı Əli Əhmədov ATƏT-in Demokratik Təsisatlar və İnsan Haqları İnstitutunun (DTİHİ) seçki departamentinin rəhbəri Nikolas Kaçorovski ilə görüşmüşdür.
Partiyanın mətbuat xidmətindən bildirmişlər ki, görüşdə bu ilin payızında Azərbaycanda keçiriləcək parlament seçkilərinə hazırlıq, eləcə də Seçki Məcəlləsinə edilmiş əlavə və dəyişiklərlə bağlı fikir mübadiləsi aparılmışdır.
Əli Əhmədov qeyd etmişdir ki, Seçki Məcəlləsinə əlavə və dəyişikliklər edilməsində başlıca məqsəd seçki praktikasını inkişaf etdirmək, Azərbaycanda seçki təcrübəsini təkmilləşdirmək və onu dünya təcrübəsinə maksimum uyğunlaşdırmaq olmuşdur. YAP sədrinin müavini bildirmişdir ki, hakimiyyət bu seçkilərin də şəffaf, demokratik və ədalətli keçirilməsində maraqlıdır və bu istiqamətdə bütün beynəlxalq təşkilatlarla əməkdaşlıq edəcəkdir.
ATƏT-in DTİHİ-nin seçki departamentinin rəhbəri Nikolas Kaçorovski seçki məsələləri ilə bağlı Azərbaycan tərəfindən açıq və səmimi münasibətə görə təmsil etdiyi qurum adından təşəkkürünü bildirmişdir. ATƏT-in Demokratik Təsisatlar və İnsan Haqları İnstitutunun seçki mütəxəssisi Conatan Stronstrit və ATƏT-in Bakı ofisinin demokratikləşmə şöbəsinin rəhbəri xanım Jaklin Karpenter görüşdə iştirak etmişlər.
AzərTAc{nl}