AzərTAc xəbər verir ki, bu sözləri sentyabrın 27-də xarici işlər nazirinin müavini Araz Əzimov ermənilərin bu yaxınlarda Xankəndi aeroportunu istifadəyə verəcəkləri barədə yaydıqları xəbərlərə münasibət bildirərkən demişdir.
Nazir müavini bildirmişdir ki, beynəlxalq hüququn Ermənistanın tərəfindən pozulması faktları artıq yenilik deyildir. Azərbaycan bu cür məsələlərdə yenə də beynəlxalq hüququn normalarını və prinsiplərini əsas götürəcək və mövqeyini dəyişməyəcəkdir. Bu hava limanının istifadəsi hazırkı şəraitdə qeyri-qanunidir. Azərbaycan tərəfi işğal altında olan ərazilərdə infrastrukturun dəyişdirilməsini, hava məkanımızdan qanunsuz şəkildə istifadəni heç vaxt qəbul etməyəcəkdir. Bu, beynəlxalq hüququn normalarına ziddir və Azərbaycanın suverenliyinə aid olan bir məsələdir.