Sentyabrın 24-də Avropa Azərbaycan Cəmiyyəti (AAC) tərəfindən Braytonda təşkil olunmuş konfransda 100-dən çox liberal-demokrat iştirak etmişdir.
Avropa Azərbaycan Cəmiyyəti (AAC) tərəfindən Braytonda konfrans təşkil olunmuşdur. AAC-dan APA-ya verilən məlumata görə, Avropa parlamentinin Avropa üzrə liberallar və demokratlar alyansının üzvü Lord German və Böyük Britaniya Lordlar Palatasının üzvü Lord Uolles (Wallace) konfransda çıxış etmişlər. Lord German şimaldan Rusiya, cənubdan isə İranla sərhəddə yerləşən Azərbaycanın Şərq və Qərb arasında tutduğu strateji mövqeyin liberal-demokratlar üçün mühüm əhəmiyyət kəsb etdiyini xüsusi vurğulamışdır. O, Azərbaycanın öz təbii sərvətlərinə əsaslanan böyük iqtisadi potensialının olduğunu diqqətə çatdıraraq Böyük Britaniyanın Azərbaycanın investisiya yatırmaq işini davam etdirdiyini bildirmişdir.
Lord German Azərbaycanın yalnız iyirmi ildir müstəqil olmasını bildirərək Britaniyanı bu ölkənin daha da inkişafı üçün yardım etməyə çağırmışdır. O, Dağlıq Qarabağın və ətraf 7 rayonunun işğalı, eləcə də 875 min nəfərin məcburi köçkünün olması faktları ilə bağlı Azərbaycanın üzləşdiyi çətinlikləri aradan qaldırmasında Böyük Britaniyanın daha çox dəstək nümayiş etdirməli olduğunu qeyd etmişdir.
Lord Uolles (Lord Wallace) isə Azərbaycanı Britaniyanın həm iqtisadi-siyasi, həm də strateji tərəfdaşı olduğunu vurğulayıb. O həmçinin Azərbaycanın Avropanın enerji təhlükəsizliyinin təmin olunmasında oynayacağı rolundan danışıb. Çıxışının sonunda Lord Uolles Azərbaycanın Böyük Britaniyanın siyasi gündəmində getdikcə daha da tanınmasında Avropa Azərbaycan Cəmiyyətinin xidmətlərini yüksək dəyərləndirib.