Sentyabrın 19-da İqtisadi İnkişaf Nazirliyinin dəstəyi, Azərbaycanda İxracın və İnvestisiyaların Təşviqi Fondunun (AZPROMO) təşkilatçılığı ilə Bakıda Azərbaycan-Sloveniya işgüzar görüşü keçirilmişdir.
Görüş çərçivəsində Azərbaycan şirkətləri üçün Sloveniyaya investisiya qoyuluşu imkanlarına dair təqdimat olmuşdur.
Azərbaycanın iqtisadi inkişaf naziri Şahin Mustafayev ölkəmizin iqtisadiyyatı barədə məlumat vermiş, investisiya imkanlarına dair təqdimatların, görüşlərin, biznes forumların sahibkarlar arasında əlaqələrin daha da genişlənməsində, ikitərəfli ticarət əlaqələrinin inkişafında əhəmiyyətli olduğunu vurğulamış, iş adamlarını fəal əməkdaşlığa dəvət etmişdir.
Sloveniya Respublikası Baş nazirinin müavini, iqtisadi inkişaf və texnologiya naziri Radovan Zerjav hər iki ölkənin böyük iqtisadi potensiala malik olduğunu, mövcud imkanlardan səmərəli istifadənin, eləcə də iş adamları arasında əməkdaşlığın genişləndirilməsinin Sloveniya və Azərbaycan arasında iqtisadi-ticarət əlaqələrinin inkişafında əhəmiyyətli olacağını demiş, sahibkarlarımızı ölkəsində həyata keçirilən investisiya layihələrində iştiraka dəvət etmişdir.
AZPROMO-nun rəhbəri vəzifəsinin icraçısı Rüfət Məmmədov ölkəmizin biznes və investisiya imkanlarına dair təqdimatla çıxış etmişdir.
Sloveniyanın İqtisadi İnkişaf və Texnologiya Nazirliyinin turizm və beynəlxalq əlaqələr üzrə direktoru Marjan Hribar təmsil etdiyi ölkənin investisiya imkanları və mövcud layihələr barədə danışmışdır.

AzərTAc