Sentyabrın 14-də Türkiyənin Azərbaycandakı səfirliyində səfir Hulusi Kılıçın diplomatik fəaliyyətinin başa çatması ilə əlaqədar vida görüşü keçirilmişdir.
Mərasimdə dövlət rəsmiləri, səfirliyin əməkdaşları, kütləvi informasiya vasitələrinin və ictimaiyyətin nümayəndələri iştirak etmişlər.
Tədbiri açan Hulusi Kılıç Azərbaycanda fəaliyyəti dövründə gördüyü işlərdən, iş adamları, dövlət rəsmiləri ilə keçirdiyi maraqlı görüşlərdən danışmışdır.
Fəaliyyətim dövründə Türkiyə ilə yanaşı, Azərbaycana da xidmət etməkdən böyük məmnunluq yaşadım, - deyən diplomat iki qardaş və dost ölkə arasında münasibətlərin bundan sonra da sürətlə inkişaf edəcəyinə əminliyini vurğulamışdır.
Azərbaycanda fəaliyyəti dövründə göstərdikləri dəstəyə görə KİV nümayəndələrinə minnətdarlığını bildirən Hulusi Kılıç qeyd etmişdir ki, bütün türkdilli ölkələr arasında qardaşlıq münasibətləri mövcuddur. Türkiyə ilə Azərbaycan isə əkiz qardaşdırlar.
Ölkəmizdəki diplomatik fəaliyyətindən qürur hissi keçirdiyini deyən səfir Azərbaycan sevgisini həmişə qəlbində yaşadacağını vurğulamışdır.
İctimai Televiziya və Radio Yayımları Şirkətinin baş direktoru İsmayıl Ömərov və Milli Məclisin deputatı Jalə Əliyeva Hulusi Kılıçın dörd il yarımlıq müddətdə iki qardaş ölkə üçün gördüyü işləri yüksək qiymətləndirmişlər.
Sonda Hulusi Kılıça xatirə hədiyyələri təqdim olunmuşdur.

AzərTAc