Sentyabrın 4-də Naxçıvan Muxtar Respublikası Ali Məclisinin sədri Vasif Talıbov Ukraynanın ölkəmizdəki səfiri Aleksandr Mişenko ilə görüşmüşdür. Ölkəmizdəki diplomatik fəaliyyətində səfirə uğurlar arzulayan Ali Məclisin sədri demişdir ki, strateji tərəfdaş olan Azərbaycan və Ukrayna arasında münasibətlər yüksələn xətlə inkişaf edir.
İki ölkə arasında mədəniyyət, turizm, ticari-iqtisadi və energetika sahələrində əlaqələrin məmnunluq doğurduğunu qeyd edən Ali Məclisin sədri bildirmişdir ki, ötən il Azərbaycanın Ukrayna ilə ticarət dövriyyəsinin həcmi 1,5 milyard ABŞ dollarına çatmışdır. Ukrayna ilə Naxçıvan Muxtar Respublikası arasındakı ticarət dövriyyəsi isə bu ilin 6 ayı ərzində 1 milyon ABŞ dolları səviyyəsində olmuşdur. Bildirilmişdir ki, ticari-iqtisadi əlaqələrin bundan sonra da genişləndirilməsi üçün böyük potensial vardır.
Görüşdə qeyd olunmuşdur ki, 2010-cu ildən Ukraynanın İrpen şəhərinin Zərifə Əliyeva küçəsində yerləşən 12 nömrəli Dilçilik məktəbi ilə Kəngərli rayonunun Şahtaxtı kəndində akademik Zərifə xanım Əliyevanın adını daşıyan Şahtaxtı kənd tam orta məktəb arasında dostluq və əməkdaşlıq münasibətləri qurulmuş, qarşılıqlı səfərlər həyata keçirilmişdir. Bu əlaqələrin ali təhsil müəssisələri səviyyəsində genişləndirilməsi üçün də böyük imkanlar vardır.
Səmimi görüşə görə minnətdarlıq edən səfir Aleksandr Mişenko Azərbaycan-Ukrayna əlaqələrinin bütün sahələrdə ciddi irəliləyişlərlə müşayiət olunduğunu bildirmişdir. Qeyd edilmişdir ki, Azərbaycanın hərtərəfli inkişafı Naxçıvan Muxtar Respublikasının timsalında özünü daha aydın şəkildə göstərir. Səfir vurğulamışdır ki, Naxçıvan Muxtar Respublikasının sosial-iqtisadi inkişafı, sənaye və turizm potensialı Ukrayna ilə müxtəlif sahələrdə əlaqələrin genişləndirilməsinə imkan verir.
Görüşdə əlaqələrin hazırkı vəziyyəti və perspektivləri ətrafında fikir mübadiləsi aparılmışdır.

AzərTAc