Dünya ölkələri Azərbaycanın regiondakı nüfuzunu və əhəmiyyətini unutmamalıdırlar. Dağlıq Qarabağ münaqişəsinin qısa zamanda həlli regionun gələcəyi üçün vacib məsələdir. Münaqişə güc tətbiq olunmadan, siyasi danışıqlar yolu ilə həll edilməlidir.
Bu fikirləri ölkəmizdə səfərdə olan Türkiyənin "Hürriyyət Daily News" qəzetinin baş redaktoru Deyvid Cadson jurnalistlərə müsahibəsində demişdir. Onun sözlərinə görə, Türkiyə həmişə olduğu kimi münaqişənin həll edilməsi istiqamətində Azərbaycanın yanındadır.
Qonaq vurğulamışdır ki, Azərbaycanın ərazi bütövlüyünü tanıtmaq və Dağlıq Qarabağ haqqında əsl həqiqətləri dünya dövlətlərinin və siyasətçilərin diqqətinə çatdırmaq məqsədi ilə "Hürriyyət Daily News" qəzetində geniş məqalələr dərc edilir.
Regionda proseslərin dəyişdiyini qeyd edən D.Cadson bildirmişdir ki, dünya dövlətlərinin Azərbaycana olan maraqları daha da güclənmişdir. Azərbaycan dünyanın enerji təhlükəsizliyində mühüm rol oynayan əsas ölkələrdən biridir.
Ölkəmizə ilk dəfə səfər etdiyini bildirən D.Cadson Türkiyə-Azərbaycan münasibətlərinə toxunaraq bildirmişdir ki, ölkələrimiz arasındakı əlaqələrin yüksək səviyyədə inkişafı bu gün də davam etməkdədir.
AzərTAc{nl}