Ölkəmizə rəsmi səfərə gələn Səudiyyə Ərəbistanı Krallığı Şura Məclisinin sədri Abdullah bin Məhəmməd bin İbrahim Al əş-Şeyx jurnalistlərə müsahibəsində demişdir ki, biz dost və bizə yaxın olan ölkəyə səfərə gəlmişik.
Azərbaycana Milli Məclisin sədri Oqtay Əsədovun dəvəti ilə gəldiyini vurğulayan qonaq qeyd etmişdir ki, məqsəd Səudiyyə Ərəbistanının Şura Məclisi ilə Azərbaycanın Milli Məclisi arasındakı əlaqələrin inkişaf etdirilməsidir. Bu da çox təbiidir. Çünki ölkələrimiz arasındakı əlaqələr çox yüksək səviyyədədir. Bu səfər, həmçinin parlamentlər arasında tanışlıq və yaxınlaşmaya, bizə yaxın və əziz olan xalqla görüşməyə xidmət edir.
Bizim əsas görüşlərimiz Milli Məclisin sədri Oqtay Əsədov və parlamentlərarası dostluq qrupunun üzvləri ilə olacaqdır. Bu görüşlərdə parlamentlərarası əlaqələrin inkişafı, beynəlxalq təşkilatlar və forumlar çərçivəsində hər iki ölkənin mövqeyinin uyğunlaşdırılması məsələlərini müzakirə edəcək, Şura Məclisinin Azərbaycan parlamentinə göstərə biləcəyi köməklik barədə fikir mübadiləsi aparacağıq.
Şura Məclisinin sədri Ermənistan-Azərbaycan, Dağlıq Qarabağ münaqişəsinin həlli ilə bağlı ölkəsinin mövqeyini ifadə edərkən vurğulamışdır ki, Səudiyyə Ərəbistanı problemin Azərbaycanın ərazi bütövlüyü çərçivəsində həlli ilə bağlı beynəlxalq təşkilatların qəbul etdiyi bütün qərar və qətnamələri dəstəkləyir. Krallığın bu məsələyə münasibəti çoxdan bəllidir və heç bir zaman dəyişməyəcəkdir.{nl}

AzərTAc