Azərbaycanın Xarici İşlər Nazirliyindən bildirmişlər ki, Argentinanın Xarici İşlər və Etiqad Nazirliyi xarici işlər naziri Elmar Məmmədyarovun bu ölkəyə rəsmi səfəri ərəfəsində rəsmi məlumat yaymışdır.
Məlumatda bildirilir: "İyulun 26-da Argentinanın xarici işlər və etiqad naziri Hektor Timerman rəsmi şəxslər və iş adamlarından ibarət nümayəndə heyətinə rəhbərlik edən Azərbaycanın xarici işlər naziri Elmar Məmmədyarov ilə Buenos-Ayresdəki San Martin sarayında görüşəcəkdir.
Bu səfər ölkələrimiz arasında əlaqələrin genişləndirilməsi prosesinin tərkib hissəsidir və Argentinanın xarici işlər nazirinin 200 argentinalı iş adamı ilə birgə cari ilin iyulunda Azərbaycana səfərindən dərhal sonra reallaşır. Nümayəndə heyətləri iyulun 27-də San Martin sarayında Argentina-Azərbaycan biznes forumunda iştirak edəcək, günün ikinci yarısında isə iş adamlarının iştirakı ilə ikitərəfli görüşlər keçiriləcəkdir.
Azərbaycanın xarici işlər nazirinin Hektor Timerman ilə yanaşı digər argentinalı nazirlər - Debora Giorgi, Norberto Yahuar və Xulio de Vido, habelə daxili və xarici ticarət katibləri Guillermo Moreno və Beatriz Paglieri ilə işgüzar görüşlərinin keçirilməsi nəzərdə tutulmuşdur".
Bundan əlavə, məlumatda vurğulanır ki, son illər dünyanın ən sürətlə inkişaf edən iqtisadiyyatına malik ölkəsi kimi Azərbaycanda 10 ildə ümumi daxili məhsul dörd dəfə, əhalinin orta aylıq gəlirləri isə təxminən doqquz dəfə artmışdır. Azərbaycan hökuməti iqtisadiyyatın şaxələndirilməsinə çalışır və Argentinanın təklif etdiyi əmtəə və texnologiyalara, xüsusilə də kənd təsərrüfatı, ərzaq emalı, infrastruktur və tikinti, eləcə də əczaçılıq, enerji və digər sahələrə maraq göstərir.

AzərTAc