Azərbaycanın işğal altında olan Dağlıq Qarabağ regionunda qondarma "seçkilərin" keçirilməsi Ermənistan-Azərbaycan, Dağlıq Qarabağ münaqişəsinin sülh yolu ilə nizamlanma prosesinə uyğun gəlmir, əksinə, bu, prosesə zərbədir.
Bu sözləri jurnalistlərə iyulun 18-də Azərbaycanın Xarici İşlər Nazirliyinin (XİN) mətbuat xidmətinin rəhbəri Elman Abdullayev demişdir.
XİN-in sözçüsü vurğulamışdır ki, bu addım mövcud status-kvonu daha da möhkəmlədir və erməni tərəfinin danışıqlar aparmaq arzusunda olmadığını təsdiqləyir. Azərbaycanın işğal altında olan ərazilərinə bizim razılığımız olmadan, qanunsuz səfər edənlər arzuolunmaz şəxslər siyahısına daxil ediləcəkdir. Azərbaycanın bu məsələdə mövqeyi prinsipialdır.
Xatırladaq ki, Ermənistanın kütləvi informasiya vasitələri Azərbaycanın erməni işğalı altında olan Dağlıq Qarabağ regionunda qondarma "prezident seçkiləri"nin keçiriləcəyi barədə məlumat yaymışdır.