Bir neçə ildir ki, ATƏT Parlament Assambleyasının (PA) tədbirlərindən birinin Azərbaycanda keçirilməsinə çalışırdıq. Nəhayət buna nail olduq. Artıq 2014-cü ildə ATƏT PA -nin ilk yay sessiyasının Azərbaycanda keçirilməsi haqqında təşkilatın daimi komitəsində qərar qəbul olunmuşdur.
Bu sözləri AzərTAc-a müsahibəsində Milli Məclis sədrinin müavini, Azərbaycanın ATƏT PA-da nümayəndə heyətinin rəhbəri Bahar Muradova demişdir.
B.Muradova bildirmişdir ki, bu, Azərbaycan üçün çox böyük uğurdur. İllik sessiyanın təşkil olunması kifayət qədər məsuliyyətli və çətin işdir. Azərbaycanın bunun öhdəsindən gələcəyinə çox böyük inamımız vardır. Artıq qurumun rəsmiləri də bu tədbirin yüksək səviyyədə keçiriləcəyi barədə indidən proqnoz verirlər. Çünki onlar ölkəmizin beynəlxalq tədbirlərə necə yüksək səviyyədə ev sahibliyi etdiyinin dəfələrlə şahidi olmuşlar. Qarşıdakı iki il ərzində görülən işlər də ATƏT-ə üzv olan ölkələrdə Azərbaycanın təbliğ olunmasına xidmət edəcəkdir.
Milli Məclis sədrinin müavini onu da vurğulamışdır ki, cari ildə tədbirə ev sahibliyi edən Monako illik yay sessiyasının uğurlu keçməsi üçün bütün səylərini ortaya qoymuşdur. Cəmi 32 min nəfər əhalisi olan Monako tədbiri böyük dövlətlər səviyyəsində təşkil etməyi bacarmışdır. Bununla da, belə məsələlərdə bütün dövlətlərin bərabər səviyyədə olması fikri özünü bir daha doğrultmuşdur.