Milli Məclisin sədri Oqtay Əsədov iyulun 2-də Azərbaycanda səfərdə olan Kolumbiya Senatının İkinci Konstitusional komitəsinin sədri senator xanım Alexsandra Moreno Pirakive ilə görüşmüşdür.

Oqtay Əsədov qonaqları salamlayaraq demişdir ki, Azərbaycan Kolumbiya ilə münasibətlərin inkişafında maraqlıdır. Qarşılıqlı səfərlər, keçirilən görüşlər ölkələrimiz arasında münasibətlərin inkişafında mühüm əhəmiyyət kəsb edir. İnanırıq ki, sizin bu səfəriniz əlaqələrimizin hərtərəfli inkişafına təkan verəcəkdir.

Milli Məclisin sədri demişdir ki, Kolumbiya Senatında Dağlıq Qarabağ, xüsusilə də Xocalı soyqırımının tanınması barədə qəbul olunmuş qərar bir daha göstərdi ki, həqiqət gec-tez öz yerini tutacaq və ədalət bərpa olunacaqdır.

Oqtay Əsədov Alexandra Moreno Pirakivenin Milli Məclisin Fəxri medalı ilə təltif olunduğunu bildirmiş və mükafatı sahibinə təqdim etmişdir.

Alexandra Moreno Pirakive Azərbaycanda onlara göstərilən qonaqpərvərliyə, eləcə də ona verilən yüksək mükafata görə minnətdarlıq etmişdir. Bildirmişdir ki, bu cür səfərlər ikitərəfli əlaqələrin bütün sahələrdə inkişafı üçün geniş imkanlar açır. Hər iki ölkənin qaçqın problemi olduğunu xatırlayan senator demişdir ki, Kolumbiya parlamentinin Xocalı soyqırımı ilə bağlı qəbul etdiyi qərar həqiqəti əks etdirir.

Alexandra Moreno Pirakive əlaqələrimizin daha da inkişaf etdirilməsi üçün hər iki ölkədə səfirliklərin açılmasının vacibliyini vurğulamışdır.

Görüşdə Azərbaycan ilə Kolumbiya arasında əlaqələrin perspektivləri, Dağlıq Qarabağ münaqişəsi və s. məsələlər ətrafında geniş fikir mübadiləsi aparılmışdır.