İyunun 10-da Azərbaycan Respublikasının Prezidenti yanında Strateji Araşdırmalar Mərkəzində (SAM) "ABŞ-ın xarici siyasətində qeyri-tarazlılıq" mövzusunda "dəyirmi masa" keçirilmişdir.
Tədbirdə ABŞ-ın tanınmış "Stratfor" araşdırmalar mərkəzinin prezidenti Corc Fridman məruzə ilə çıxış etmişdir. Qonaq ABŞ-ın xarici siyasətinin prioritet istiqamətləri, ABŞ-Azərbaycan əlaqələri, Cənubi Qafqaz və Yaxın Şərq regionlarında mövcud vəziyyət, Ermənistan-Azərbaycan, Dağlıq Qarabağ münaqişəsi kimi məsələlərə toxunmuşdur.
Azərbaycana səfər etməsindən məmnunluğunu bildirən C.Fridman ölkəmizdə şahidi olduğu inkişaf proseslərini yüksək qiymətləndirmişdir. Azərbaycanın regionda böyük nüfuza və mühüm strateji əhəmiyyətə malik olduğunu qeyd edən C.Fridman ABŞ-ın bu amili daim diqqətdə saxlamasının vacibliyini vurğulamışdır.
Qonaq Dağlıq Qarabağ münaqişəsi ilə bağlı demişdir ki, problemin tezliklə həlli regionun təhlükəsizliyi baxımından zəruridir. Münaqişənin sülh yolu ilə, beynəlxalq hüququn prinsipləri əsasında həll edilməsinin vacibliyini vurğulayan C.Fridman əlavə etmişdir ki, ABŞ bu məsələdə fəallıq nümayiş etdirməlidir.
"Dəyirmi masa"da Xarici İşlər Nazirliyinin və Azərbaycan Diplomatik Akademiyasının məsul əməkdaşları, Milli Məclisin deputatları, ölkəmizdə akkreditə olunmuş diplomatik nümayəndəliklərin təmsilçiləri, regional və beynəlxalq münasibətlər üzrə mütəxəssislər iştirak etmişlər.{nl}