Azərbaycanın xarici işlər naziri Elmar Məmmədyarov ölkəmizdə rəsmi səfərdə olan Estoniya parlamentinin sədri Ene Erqmanın başçılıq etdiyi nümayəndə heyəti ilə görüşmüşdür. 
Xarici İşlər Nazirliyinin mətbuat xidmətindən bildirmişlər ki, nazir Elmar Məmmədyarov Estoniya parlamentinin sədri Ene Erqmanın ölkəmizə səfərini yüksək qiymətləndirmişdir. O, bu səfərin iki ölkə arasında münasibətlərin inkişafına xidmət edəcəyini vurğulamışdır.
Azərbaycana səfərindən məmnunluğunu bildirən Estoniya parlamentinin sədri ölkəmizin mühüm strateji əhəmiyyətə malik olduğunu vurğulamışdır.
Görüşdə Azərbaycan ilə Estoniya arasında münasibətlərin inkişaf etdirilməsində hər iki ölkənin dövlət başçılarının rolu xüsusi vurğulanmışdır. Həmçinin Ermənistan-Azərbaycan, Dağlıq Qarabağ münaqişəsinin beynəlxalq hüququn prinsipləri və normaları, xüsusilə BMT Təhlükəsizlik Şurasının müvafiq qətnamələri, ərazi bütövlüyü və sərhədlərin toxunulmazlığı prinsipləri əsasında həll olunmasının vacibliyi diqqətə çatdırılmışdır.
İki ölkə arasında ikitərəfli münasibətlərin inkişaf etdirilməsinin əhəmiyyətinin vurğulandığı görüşdə bu istiqamətdə səylərin artırılmasının vacibliyi qeyd olunmuşdur.
AzərTAc