Azərbaycanın xarici işlər naziri Elmar Məmmədyarov iyunun 10-da Avropa Parlamentinin Xarici Əlaqələr Komitəsinin sədr müavini Fiorello Proveranın rəhbərlik etdiyi nümayəndə heyəti ilə görüşmüşdür.
XİN-in mətbuat xidmətindən bildirmişlər ki, Azərbaycanın müasir, dünyəvi və sürətlə inkişaf edən ölkə olduğunu qeyd edən qonaq bu inkişafın potensialının respublikamız üçün geniş perspektivlər yaratdığını və Avropa ölkələri ilə əlaqələrin gücləndirilməsi üçün əlavə imkanlar verdiyini qeyd etmişdir.
Nazir E.Məmmədyarov F.Proveranın Azərbaycana növbəti dəfə səfər etməsindən məmnunluğunu bildirərək mayın 20-də Avropa Parlamentinin qəbul etdiyi "Avropa İttifaqının Cənubi Qafqazda strategiyasına tələb" qətnaməsində ölkəmizin ərazi bütövlüyünə birmənalı dəstək verilməsini yüksək qiymətləndirmişdir.
Nazir beynəlxalq aləmin Ermənistanın işğalçı siyasətinə son qoyulmasına və Dağlıq Qarabağ münaqişəsində status-kvonun saxlanılmasının mümkünsüzlüyünə dair çağırışların gücləndirilməsinin vacibliyini qonağın diqqətinə çatdırmışdır.
F.Provera isə XXI əsrdə güc tətbiq etməklə suveren dövlətlərin sərhədlərinin dəyişdirilməsi cəhdlərini yolverilməz hal kimi qiymətləndirmişdir. Tərəflər enerji, ticarət və digər qarşılıqlı maraq doğuran məsələlər ətrafında fikir mübadiləsi aparmışlar.
AzərTAc{nl}