ABŞ Senatının Xarici Münasibətlər üzrə Komitəsi iyunun 19-dakı iclasında Ağ Evin Azərbaycana səfir vəzifəsinə irəli sürülən, hazırda Dövlət Departamentində Avrasiya enerji məsələləri üzrə xüsusi nümayəndə Riçard Morninqstarın namizədliyini dəstəkləmişdir. 
Demokrat senator Con Kerrinin sədrliyi ilə keçirilən iclasda Senat üzvləri yekdilliklə məsələyə Senatın tam tərkibli iclasında baxılmasını tövsiyə etmişlər. Qeyd edək ki, Senatın tam tərkibinin qərarı Riçard Morninqstarın Azərbaycana səfir kimi təsdiqlənməsi prosesində sonuncu pillədir.
Ötən dəfədən fərqli olaraq, bu dəfə erməni mənşəli elektoratın təsiri altında qərarlar qəbul edən Xarici Münasibətlər üzrə Komitənin üzvləri, kaliforniyalı senator Barbara Bokser və Nyu-Cersi ştatının nümayəndəsi Robert Menendez yeni namizədə qarşı veto hüququndan istifadə etməmişlər.

Şəfəq AKİFQIZI, AzərTAc-ın xüsusi müxbiri
Vaşinqton