Ermənistan-Azərbaycan, Dağlıq Qarabağ münaqişəsinin tez bir zamanda həlli regionun gələcəyi üçün vacibdir. ABŞ Azərbaycanın regiondakı nüfuzunu və əhəmiyyətini unutmamalı və münaqişənin həllində fəal olmalıdır.
Bu sözləri ölkəmizdə səfərdə olan ABŞ-ın tanınmış "Stratfor" Araşdırmalar Mərkəzinin prezidenti Corc Fridman iyunun 9-da jurnalistlərə müsahibəsində demişdir.
Azərbaycan qazının Türkiyəyə ixracı ilə bağlı İstanbulda imzalanan sazişə toxunan C.Fridman qeyd etmişdir ki, bu, bölgədə energetika sahəsində münasibətlər üçün sabit baza yaradacaq və ABŞ-Azərbaycan əlaqələrində yeni mərhələnin başlanğıcı olacaqdır. Bu saziş region üçün çox əhəmiyyətlidir. Bundan təkcə Azərbaycan və Türkiyə deyil, eyni zamanda digər ölkələr də faydalanacaqlar.
ABŞ-Azərbaycan münasibətlərindən danışan C.Fridman bildirmişdir ki, kimlərsə iki ölkə arasındakı münasibətlərə kölgə salmağa çalışır. Amma bu münasibətlər həmişə yüksək səviyyədə olmuşdur. Regionda proseslərin dəyişməsi ABŞ-ın Azərbaycana olan maraqlarını daha da gücləndirir. Azərbaycan dünyanın enerji təhlükəsizliyində mühüm rol oynayan əsas ölkələrdən biridir.{nl}