"Müxalifət partiyaların bəyanatları və hansı addım atmaları bizi narahat etmir. Sadəcə olaraq, xalqımız onların nəyə qadir olduqlarını və kimlər olduğunu bir daha müəyyən etdi". Bu fikirləri yap.org.az saytına YAP İcra katibinin müavini, Milli Məclisin deputatı Siyavuş Novruzov deyib.
S.Novruzov bildirib ki, radikal müxalifət üçün vətən, dövlət, millət marağı yoxdur. Onun sözlərinə görə, bu dairələr yalnız özlərinin və qulluq etdikləri ağalarının marağını güdürlər.
"Təbii ki, onlar siyasətin arxivindədirlər və son hərəkətləri ilə arxivdəki yerlərini daha dərinləşdirirlər. Ölkə vətəndaşları, cəmiyyətimiz ümummilli məsələlərdə müxalifət düşərgəsinin həmrəyliyinin şahidi olmayıb. Xüsusilə, "Eurovision" mahnı müsabiqəsi ərəfəsində əllərindən gələni etdilər ki, ölkəmizin imicinə zərbə vursunlar. Belə qənaətə gəlmək olur ki, sabah ordumuz torpaqlarımızı azad etməyə başlayanda, bu cür arxadan xəncər vuranlar nə oyundan çıxa bilərlər. Bir müddət əvvəl xeyli əcnəbi jurnalist ölkəmizdə səfərdə oldu. Yaxşı fürsət idi ki, Qarabağ həqiqətləri barədə onların vasitəsilə dünya ictimaiyyətinə məlumatlar çatdırılsın. Amma müxalifət təmsilçiləri Qarabağla bağlı bir kəlmə də danışmadılar. Bunu ona görə etmədilər ki, xarici havadarlarının xoşuna gəlməzdi. Axı onlar belə tapşırıq verməmişdilər. Radikal müxalifət partiyaları yalnız xarici havadarları üçün canfəşanlıq etdi. Sözsüz ki, həmin partiyaların rəhbərləri bunun müqabilində pul alıb yay istirahətinə gedəcəklər. Yəni bu müxalifət üçün xalqın taleyi vacib deyil, əsas özlərinin mədəsidir"- deyə YAP İcra katibinin müavini vurğulayıb.