Belarus Azərbaycanla istehsalın lokallaşdırılması, habelə müəyyən sahələr üzrə təcrübə və biliklərini bölüşməyə hazırdır.
BELTA informasiya agentliyi xəbər verir ki, bunu Belarusun xarici işlər naziri Sergey Martınov bildirmişdir.
Belarus Prezidenti Aleksandr Lukaşenkonun Azərbaycana səfərinin yekunlarını şərh edən nazir vurğulamışdır ki, səfərin məqsədlərinə nail olunmuşdur. O demişdir: "Bu səfər Belarus ilə Azərbaycan arasında ikitərəfli münasibətləri sistemli inkişaf etdirmək məqsədi güdürdü".
Nazirin fikrincə, 4 il ərzində dövlət başçıları səviyyəsində 4-cü qarşılıqlı səfər ikitərəfli münasibətlərin konstruktivliyindən xəbər verir.
S.Martınov demişdir: "Lakin onların sistemliyi təkcə yüksək səviyyədə səfərlər mübadiləsi ilə deyil, müəssisə, sahə, idarə rəhbərlərinin getdikcə artan qarşılıqlı səfərləri, təcrübə mübadiləsi, sıx əməkdaşlıq münasibətlərinin qurulması ilə ifadə olunur".
Cari ilin təkcə ilk ayları ərzində iki ölkənin mütəxəssisləri yüzlərlə qarşılıqlı səfər həyata keçirmişlər. Sistemlilik kənd təsərrüfatından tutmuş sənaye sahəsinə və memarlıq layihələrinədək ən müxtəlif istiqamətlərdə özünü göstərir.
Nazirin sözlərinə görə, Belarus Azərbaycan ilə münasibətlərdə böyük potensial görür. Ölkələr bir çox əməkdaşlıq sahələri çərçivəsində bir-biri üçün faydalı ola bilərlər. Gələcəkdə isə yüksək səviyyədə imzalanmış müqavilələrin həyata keçirilməsi istiqamətində ciddi iş aparılacaqdır.