Aprelin 23-də Azərbaycanın xarici işlər naziri Elmar Məmmədyarov ölkəmizdə rəsmi səfərdə olan israilli həmkarı Aviqdor Liberman ilə görüşmüşdür.
Görüşdə ölkələrimiz arasında əlaqələrin müxtəlif sahələrdə uğurla inkişaf etdiyi vurğulanmışdır.
Azərbaycanın iqtisadi inkişafının göz qabağında olduğunu deyən A.Liberman ölkələrimiz arasında əlaqələrin müxtəlif sahələrdə daha da genişləndirilməsinin vacibliyini qeyd etmişdir.
Azərbaycan ilə İsrail arasında müqavilə-hüquq bazasının genişləndirilməsinin əhəmiyyəti də vurğulandığı görüşdə israilli nazir ölkəmizin BMT Təhlükəsizlik Şurasına üzv seçilməsindən məmnun olduğunu, beynəlxalq təşkilatlar çərçivəsində əməkdaşlığın daha da dərinləşdirilməsinin vacibliyini qeyd etmişdir.
E.Məmmədyarov israilli həmkarına Ermənistan-Azərbaycan, Dağlıq Qarabağ münaqişəsinin sülh yolu ilə həlli prosesi istiqamətində atılan addımlar barədə ətraflı məlumat vermişdir.
Görüşdə, həmçinin qarşılıqlı maraq doğuran bir sıra məsələlərlə bağlı fikir mübadiləsi aparılmışdır.

AzərTAc